Blon klaar tegang kite ame hingar bingar pulitik, tau-tau kedengeran bom mleduk lagi di ibukota kite, jum’at kmaren. Kagak tanggung-tanggung tempat kejadian ade di dua hotel nyang bintangnye banyak, b’deketan pula.. Hotel JW Marriot ame Ritz Carlton nyang punye tarap dunie. Walhasil nyang jadi korban liwat 9 orang, nyang lecet lebi dari limepulu orang.
Kontan aje muke bangse ng’renyep! Persiden RI nyap-nyap di tipi. Segale tebak diumbar dengen info kang intip negare alias BIN. Elit nyang laen ujug-ujug nyamber kaya g’ledeg, nyaut bekilah skalian dulang simpati. Nyang bikin kagak enak ati lagi, kleb jago bola dari Inggris, Manchester United (MU) dengen sepihak ngebatalin hajat ngadu bola ame anak kampung kite. Alesannye ude ktebak, die pade ciut nyali ame bom nyang punye riwayat sering m’leduk di Indonesia. Blon lagi katenye MU mao numpang tidur di salah satu hotel nyang m’leduk tadi. Mungkin MU bakal girang kalu disambut ame petasan percis hajatan orang betawi. Nah eni bom?!.. Ogah!
Saye pribadi ude gedeg kagak kepalang ame kang ngebom di mari. Biarkate biangnye nyang dari negeri jiran, dr. Azhari, ude mati tapi nyang atu lagi si Nurdin M. Top, belonan! Kalu ngliat nage-nagenye, emang eni kerjaan si Nurdin cs. Pulisi lagi pade ng’reken sembari nyelidik eni kasus.
Nyang jelas, siape aje nyang bikin ulah ame kejadian bom jumat kmaren, die orang pinter banget.. Pgimane kagak? Die pake banyak momentum nyang bikin orang jadi pade nebak-nebak kagak keruan, semisal: momentum abis pileg/pilpres, di mane orang lagi pade keblinger mikirin ntu urusan b’rebut kuase. Die juga pake momentum hajat orang bule nyang pade mao dateng ke Indonesia, biar kate cuma mao maen bola doang, tapi efek britanye atu bumi. Die orang juga ngebom pake momentum nyang kagak jauh dari waktu kerampokannye milyaran duit BNI, ame ng’grebegnye pulisi densus88 ke tempat ngumpet Nurdin M. Top di cilacap tempo ari. T’rakhir, nyang pasti tu orang tau bener kapan m’lengnye sekuriti di dua hotel apes tadi, sampe-sampe kecolongan masup bom ngliwatin p’mreksaan.. Kalu momentum Maikel Jeksen meninggal, kayanye kagak ade urusan..
Dari sekian momentum nyang ade, trus dipili ari, jadi dah ntu ‘barang’! Efeknye jelas, semua tebakan bakalan jadi nongol kagak pake saringan lagi. Mulain dari orang ngejogrog di warung kupi, ampe’ orang sekelas persiden SBY, asal gobleg aje pating becotot kagak keruan.. Kalu ude gini nyang kudu’ konsen kagak bole m’leng, ye pak pulisi. Slaen kudu’ nangkepin Nurdin M. Top cs, die pade mesti bisa’ ngendusin supaye jangan ade lagi bom nyang m’leduk di negare kite. Tak use pusing ame elit pulitik nyang pade b’klai bebarengan ame asep bom..
Apeg bener eni bangse.. Segitu gampang diklece’in ame bandit! Ye bandit kriminal kelas ncu’ ampe’ kelas kakap, bandit kurupsi, bandit ngebom, bandit copet, ampe’ bandit pulitik..
Ya Allah, tulung lindungin orang-orang nyang masing baek di negeri eni. Kalu nyang jahat ame rakyat, kagak pape die mati kena bom.. Amin ya Allah! Wassalam.. *benain peci, ngelipet sejadah
Kalo di Jakarta mleduk, di Pekanbaru malah banyak kabut asap. belon lagi listriknya mati kayak orang minum obat. 3 kali sehari selama 3 jam. malahan ada yang sampe 12 jam…bijimane tuh bang??
Jiaahhh.. uniy! Tibang asep pu’un kebakar ame listrik ko’it mah kagak sebanding ame bom nyang pade m’letus kagak ketebak di marih.. Tapi dua-duanye tetep aje same-same nyusahin orang banyak! Entu die irisannye, same-same musu rakyat mesti kite lawan bareng-bareng, jangan kendirian..
Ngomong-ngomong, lantaran bom jum’at kmaren, saye jadi kagak bisa’ maen ke hotel meriyot lagi.. maklum aje, kang ngelap kaca.. *ngloyor nenteng kanebo
hihi. bang idoy kocag. pake g.
sistemmnye bang .. sistem negare kite nyang sale.
mayoritas muslim dipakse buat ngejalanin sistem nyang gak dikenal ame agamanye kendiri.. yahh begitu dahh hasilnye, jadi pade kebingungan .. hehehhe .. pikirin dah baek2 dengan ngeliat sejarah awal kebentuknye negare kite dan tentu aje pake Al Qur’an dan Assunnahnye .. heehehe.. begitu pesen ngkong haji Pitung…
kalo sistemnye kagak diganti.. sampe kiamat tujuh kali juga gak bakalan bener negeri nyang mayoritaS MUSLIM eni .. nah, pegimane mao bener. orang ape nyang ade didalem ati-nye beda banget dengan ape nyang kudu dilaksanain..
ati-nye pengen masuk sorge , ehhh, sistemnye ngajak ke norake .. hehhehe .. bingung dahh pade ..
Bener ape kate bang aqse..
Kite negeri (masyoritas) muslim, tapi jalan pake patokan qur’an ame hadist, rade kblangsak jadinye. Kite coba liatin aje kasus bank century nyang jadi ribet lantaran make sistem talang2an model barat. Bole jadi ntu bakalan jadi momentum, eni bangse k depan mikin maju atawe lebi ancur?
Ngomong2 mekasi ude mampir ame komentar di mari, bang.. š